മലയാളിയുടെ ടിന്റുമോന് ലോകമെങ്ങും കൂട്ടുകാര്
വാഷിങ്ടണ്: ആഗോള മലയാളിയുടെ പുതിയ ഹാസ്യ സൂപ്പര്സ്റ്റാര് ടിന്റുമോന് വിവിധ ലോകരാജ്യങ്ങളില് സമാന സ്വഭാവമുള്ള കൂട്ടുകാര്. കൊച്ചുവായില് വലിയ വര്ത്തമാനം പറയുന്ന ഇത്തരം കുട്ടിക്കഥാപാത്രങ്ങള് വിവിധ വിദേശ നാടുകളില് ഏറെ പ്രശസ്തരാണ്. അമേരിക്കയിലും ഇംഗ്ലണ്ടിലും വര്ഷങ്ങളായി വന് ജനപ്രീതിയുള്ള ലിറ്റില്ജോണിയാണ് ഇക്കാര്യത്തില് ഒന്നാമന്.
മിക്കപ്പോഴും അല്പം വഷളന് തമാശകള് പറയുന്ന ജോണിയെ അക്കാരണത്താല് തന്നെ ലിറ്റില് ഡേര്ട്ടി ജോണി (വഷളന് ജോണി) എന്നും വിശേഷിപ്പിക്കാറുണ്ട്. മലയാളത്തില് ടിന്റുമോനെപ്പോലെ ഇംഗ്ലീഷില് ജോണിയുടെ പിറവിയും തര്ക്കവിഷയമാണ്. 'ജോണി ജോണി യെസ് പപ്പാ..., റെയിന് റെയിന് ഗോ എവെ... തുടങ്ങി നിരവധി നഴ്സറി ഗാനങ്ങളില് പ്രത്യക്ഷപ്പെടുന്ന അതേ ലിറ്റില് ജോണിയാണ് പിന്നീടെന്നോ തമാശക്കാരനായ കുസൃതിക്കുട്ടിയായി മാറിയതെന്ന് ഈ വിഷയത്തില് പഠനം നടത്തിയവര് പറയുന്നു. ജോണി തമാശകള്ക്കായി നൂറുകണക്കിന് വെബ്സൈറ്റുകളുണ്ട്.
തെക്കുപടിഞ്ഞാറന് യൂറോപ്യന് രാജ്യമായ സ്പെയിനില് ലിറ്റില്ജോണിക്ക് 'ജെയ്മിറ്റോ' എന്നാണ് പേര്. ക്യൂബ, മെക്സിക്കോ തുടങ്ങിയ രാജ്യങ്ങളിലും ജെയ്മിറ്റോ എന്ന കുരുത്തംകെട്ട ചെക്കന്റെ ഫലിതങ്ങള്ക്ക് ഏറെ ആരാധകരുണ്ട്. വടക്കന് യൂറോപ്യന് രാജ്യമായ ഫിന്ലന്റില് 'പിക്കുകാലേ' എന്നാണ് തമാശക്കുട്ടിയുടെ പേര്. 1970 കളിലാണ് ഈ കഥാപാത്രം പ്രചാരം നേടുന്നത്.
ബ്രസീലില് 'ലിറ്റില് ജോവാ' എന്ന കുട്ടിക്കഥാപാത്രവും ടിന്റുമോനെപ്പോലെ കിടിലന് തമാശകള് പറയുന്നവനാണ്. ഫ്രാന്സ് അടക്കം പല രാജ്യങ്ങളിലും പ്രചാരമുള്ള 'ടോട്ടോ'യും കുസൃതിക്കാരനായ സ്കൂള് കുട്ടിയാണ്. മധ്യ യൂറോപ്പിലെ ചെക്റിപ്പബ്ലിക്കില് 'പെപിക്' എന്നും സെര്ബിയയിലും ക്രൊയേഷ്യയിലും 'പെരിക്കാ' എന്നും റുമേനിയയില് 'ബുലാ' എന്നും അറിയപ്പെടുന്ന കഥാപാത്രങ്ങളും ടിന്റുമോന്റെ വിദേശ പതിപ്പുകളാണ്.
റഷ്യയില് സ്കൂള്ടീച്ചറുടെ ചോദ്യങ്ങള്ക്കെല്ലാം തലതെറിച്ച ഉത്തരം പറയുന്ന 'വൊവോഷ്ക' കമ്യൂണിസ്റ്റ് ഭരണകാലം മുതല് പ്രശസ്തനാണ്. ജര്മനിയില് 'ലിറ്റില് ഫ്രിറ്റ്സ്' എന്നും നെതര്ലന്റ്സില് 'ജാന്' എന്നും അറിയപ്പെടുന്ന കുട്ടികളും തമാശകളിലൂടെ സാമൂഹിക യാഥാര്ഥ്യങ്ങള് പറയുന്നവരാണ്. ഇറ്റലിയില് 'പിയറെ' എന്ന കുട്ടി കഥാപാത്രം പതിനേഴാം നൂറ്റാണ്ടു മുതല് പ്രശസ്തനാണ്. മലയാളത്തിലെ ടിന്റുമോനെപ്പോലെ ഇവരുടെയെല്ലാം പിറവി അജ്ഞാതമാണ്.
ചരിത്രത്തിലെ ഒരു സവിശേഷ കാലഘട്ടത്തില് സാമൂഹികാവസ്ഥകളോടുള്ള ജനങ്ങളുടെ പരിഹാസം പ്രതിഫലിപ്പിക്കാനായി രൂപപ്പെടുന്ന ഇത്തരം സാങ്കല്പ്പിക ഹാസ്യ കഥാപാത്രങ്ങള് ഇന്ന് നരവംശ, സാമൂഹ്യ ശാസ്ത്രജ്ഞരുടെ പഠനവിഷയമാണ്. കേരളത്തിലും ടിന്റുമോനെക്കുറിച്ച് ഇതിനകം പഠനങ്ങള് വന്നുകഴിഞ്ഞു. വികൃതികളായ കാര്ട്ടൂണ് കഥാപാത്രങ്ങള് ഏറെയുണ്ടെങ്കിലും അവര്ക്കൊന്നുമില്ലാത്ത പ്രചാരമാണ് ഈ അജ്ഞാത വികൃതികള് നേടുന്നത്. ബ്രിട്ടനില് തോംസണ് കമ്പനി സൃഷ്ടിച്ച ഡെന്നിസ് ദ മൈനസ്, അമേരിക്കയിലെ ആര്ച്ചി കോമിക്സ് കമ്പനിയുടെ ലിറ്റില് ആര്ച്ചി, മലയാളത്തില് ടോംസിന്റെ ബോബന്, മോളി, ഉണ്ണിക്കുട്ടന് തുടങ്ങി വികൃതികുട്ടികളായ കാര്ട്ടൂണ് കഥാപാത്രങ്ങള് അനവധി ഉണ്ട്.
വ്യക്തമായ രൂപവും രചയിതാവും പകര്പ്പവകാശവുമുള്ള ഇവരില് നിന്ന് ഏറെ വ്യത്യസ്തരാണ് എവിടെനിന്നോ പ്രത്യക്ഷരായി പ്രശസ്തരായ ടിന്റുവും ലിറ്റില്ജോണിയുമൊക്കെ.
