പാക് ജയില് ആക്രമിച്ച് 300 തടവുകാരെ രക്ഷപ്പെടുത്തി
ഇസ്ലാമാബാദ് : പാകിസ്താനിലെ ബാനു സെന്ട്രല് ജയില് ആക്രമിച്ച് തീവ്രവാദികള് 300 പേരെ മോചിപ്പിച്ചു. ഞായറാഴ്ച പുലര്ച്ചെ ഒന്നരയോടെയായിരുന്നു സംഭവം. റോക്കറ്റുകളും, ഗ്രനേഡുകളും തോക്കുകളുമായെത്തിയ തീവ്രവാദികള് ജയില് പിടിച്ചെടുത്ത ശേഷമാണ് തീവ്രവാദക്കേസിലെ പ്രതികളടക്കം 300 പേരെ മോചിപ്പിച്ചതെന്ന് പോലീസ് ഓഫീസറായ മിര്സാ ഹിബ്ജാന് വാര്ത്താ ഏജന്സിയോട് പറഞ്ഞു.
ആക്രമണത്തില് തടവുപുള്ളികള് അടക്കം നിരവധി പേര്ക്ക് പരിക്കേറ്റിട്ടുണ്ട്. 300-നും 400-നും ഇടയ്ക്ക് തടവുകാര് രക്ഷപ്പെട്ടതായി വാര്ത്തകളുണ്ട്. ജയില് സ്ഥിതിചെയ്യുന്ന പ്രദേശം ഇപ്പോള് സൈന്യം വളഞ്ഞിരിക്കുകയാണ്. 150-ലേറെ വരുന്ന തീവ്രവാദികള് പുലര്ച്ചെയാണ് ആക്രമണം അഴിച്ചുവിട്ടത്. ജയില് ഗേറ്റുകള് സ്ഫോടനത്തിലൂടെ തകര്ത്തശേഷമാണ് അക്രമികള് അകത്തുകടന്നത്. തടവുകാര്ക്ക് സഞ്ചരിക്കാനായി വാഹനങ്ങളും അക്രമികള് കരുതിയിരുന്നു.
ആറ് സെല്ബ്ലോക്കുകളിലായി 944 തടവുകാരാണ് ബാനു സെന്്ട്രല് ജയിലിലുള്ളത്. അല് ഖായ്ദയുമായി ബന്ധമുള്ള തെരീക് ഇതാലിബാന് എന്ന രാജ്യവിരുദ്ധ സംഘടനകളുടെ കൂട്ടായ്മ ആക്രമണത്തിന്റെ ഉത്തരവാദിത്തം ഏറ്റെടുത്തിട്ടുണ്ട്.
