ഐക്യരാഷ്ട്ര സ്ഥിരാംഗത്വം; വീറ്റോയില് വിട്ടുവീഴ്ചക്ക് ഇന്ത്യ
യുനൈറ്റഡ് നേഷന്സ്: ഐക്യരാഷ്ട്ര രക്ഷാസമിതിയില് സ്ഥിരാംഗത്വം കിട്ടിയാല് വീറ്റോ അധികാരം കൂടി വേണമെന്ന് നിര്ബന്ധം പിടിക്കില്ലെന്ന് ഇന്ത്യ. ഇപ്പോള് സ്ഥിരാംഗത്വമുള്ള രാജ്യങ്ങള്ക്കുള്ള എല്ലാ അവകാശങ്ങളും തങ്ങള്ക്കും വേണമെന്നായിരുന്നു അടുത്തിടവരെ ഇന്ത്യയുടെ വാദം. ഇതാദ്യമായാണ് സ്ഥിരാംഗത്വത്തിനൊപ്പം വീറ്റോ അധികാരം ചോദിക്കില്ലെന്ന് ഇന്ത്യ പരസ്യമായി പ്രഖ്യാപിക്കുന്നത്. വീറ്റോ അധികാരമില്ലാത്ത സ്ഥിരാംഗത്വം സ്വീകാര്യമാണെന്ന് യു.എന്നിലെ ഇന്ത്യന് അംബാസഡര് ഹര്ദീപ് സിങ് പുരി വ്യക്തമാക്കി.
ലോകസമാധാനവും സുരക്ഷയും ലക്ഷ്യമാക്കി 1945 ല് സ്ഥാപിക്കപ്പെട്ട ഐക്യരാഷ്ട്രസഭയില് ഇപ്പോള് ഇന്ത്യയടക്കം 192 സാധാരണ അംഗങ്ങളുണ്ട്. പക്ഷേ, ഐക്യരാഷ്ട്രസഭയുടെ രക്ഷാസമിതിയിലെ (സെക്യൂരിറ്റി കൗണ്സില്) അഞ്ച് സ്ഥിരാംഗങ്ങളായ ചൈന, ഫ്രാന്സ്, റഷ്യ, അമേരിക്ക, ബ്രിട്ടന് എന്നിവരാണ് സംഘടനയെ പ്രധാനമായും നയിക്കുന്നതും നയങ്ങള് തീരുമാനിക്കുന്നതും. വീറ്റോ അധികാരമുള്ള ഈ വന്ശക്തി രാജ്യങ്ങള്ക്ക് മറ്റുള്ള അംഗങ്ങളുടെ ഏതു ഭൂരിപക്ഷ തീരുമാനത്തേയും വീറ്റോ പ്രയോഗിച്ച് അസാധുവാക്കാം. ഐക്യരാഷ്ട്ര രക്ഷാസമിതിയില് അഞ്ച് സ്ഥിരാംഗങ്ങള്ക്കു പുറമേ പത്ത് താല്കാലിക അംഗങ്ങളും ഉണ്ട്. ഇവരെ ഊഴമനുസരിച്ച് പൊതുസഭ (ജനറല് അസംബ്ലി) ആണ് തെരഞ്ഞെടുക്കുക. മാറിയ ലോകസാഹചര്യത്തില് വന്ശക്തി രാജ്യങ്ങള്ക്കു പുറമെ തങ്ങള്ക്കും യു.എന് രക്ഷാസമിതിയില് സ്ഥിരാംഗത്വം വേണമെന്ന് ഇന്ത്യയും ബ്രസീലും ജര്മനിയും ജപ്പാനും ഏറെക്കാലമായി ആവശ്യപ്പെടുന്നുണ്ട്.
