രാജ്യത്ത് ആദ്യമായി ജാതി സെന്സസ് നടത്താന് തീരുമാനം
ന്യൂദല്ഹി: അഭിപ്രായ ഭിന്നതകള്ക്കൊടുവില്, സ്വതന്ത്ര ഇന്ത്യയുടെ ചരിത്രത്തിലാദ്യമായി രാജ്യത്ത് ജാതി സെന്സസ് നടത്താന് കേന്ദ്ര തീരുമാനം. ഡിസംബര് മുതല് ജാതി അടിസ്ഥാനത്തില് സെന്സസ് നടത്തുന്നതിന് ധനമന്ത്രി പ്രണബ് മുഖര്ജിയുടെ അധ്യക്ഷതയിലുള്ള മന്ത്രിതല സമിതിയാണ് ധാരണയില് എത്തിയത്.
പ്രണബ് മുഖര്ജിക്ക് പുറമെ, കേന്ദ്രമന്ത്രിമാരായ എ.കെ. ആന്റണി, ശരത് പവാര്, പി. ചിദംബരം, മമതാ ബാനര്ജി, വീരപ്പ മൊയ്ലി, ഫാറൂഖ് അബ്ദുല്ല, ദയാനിധി മാരന്, കപില് സിബല്, സല്മാന് ഖുര്ശിദ്, മുകുള് വാസ്നിക് എന്നിവര് ഉള്പ്പെട്ടതാണ് മന്ത്രിതല സമിതി.
വിവിധ രാഷ്ട്രീയ പാര്ട്ടികളുടെ അഭിപ്രായങ്ങള് പരിഗണിച്ച ശേഷമാണ് അന്തിമ തീരുമാനം. ജാതി തിരിച്ച് കണക്കെടുപ്പ് നടത്തണമെന്ന ആവശ്യം ശക്തമായി ഉയര്ന്നു വന്നതിനെ തുടര്ന്ന് വിഷയം രണ്ടു വട്ടം കേന്ദ്രമന്ത്രിസഭ ചര്ച്ച ചെയ്തെങ്കിലും സമവായത്തില് എത്താനായില്ല. തുടര്ന്നാണ് പ്രണബ് മുഖര്ജിയുടെ നേതൃത്വത്തില് മന്ത്രിതല സമിതി രൂപവത്കരിച്ചത്. സമിതിക്കും ഏകാഭിപ്രായത്തില് എത്താന് കഴിയാതെ വന്നപ്പോള് വിവിധ രാഷ്ട്രീയ പാര്ട്ടികളുടെ അഭിപ്രായം തേടാന് തീരുമാനിക്കുകയായിരുന്നു.
ജാതി സെന്സസിനെ തുടക്കത്തില് എതിര്ത്ത ബി.ജെ.പി, ആര്.എസ്.എസ് സമ്മര്ദങ്ങള്ക്കൊടുവില് ചുവടു മാറ്റിയതോടെയാണ് ജാതി സെന്സസിന് വഴി സുഗമമായത്. കോണ്ഗ്രസിലും അഭിപ്രായ വ്യത്യാസം ഉണ്ടായിരുന്നു. എന്നാല് സമവായ നിലപാടിനൊത്ത് മുന്നോട്ടു പോകാമെന്ന് ഒടുവില് കോണ്ഗ്രസും വ്യക്തമാക്കി.
ജാതി തിരിച്ചുള്ള കണക്കെടുപ്പിന് വേണ്ടി കഴിഞ്ഞ പാര്ലമെന്റ് സമ്മേളനത്തില് സമാജ്വാദി പാര്ട്ടി, ആര്.ജെ.ഡി, ജെ.ഡിയു നേതാക്കള് ഉയര്ത്തിയ ശക്തമായ സമ്മര്ദമാണ് ഇപ്പോള് ഫലം കാണുന്നത്.
