നടനസൗകുമാര്യം മറഞ്ഞു
ആറു പതിറ്റാണ്ടിലേറേ നീണ്ട അഭിനയസപര്യയിലൂടെ വൈവിധ്യമാര്ന്ന നിരവധി കഥാപാത്രങ്ങളെ സമ്മാനിച്ച് മലയാളസിനിമയെ സമ്പന്നമാക്കിയ സുകുമാരി (73) അന്തരിച്ചു. കഴിഞ്ഞമാസം 27നു പൂജാമുറിയില്നിന്നു പൊള്ളലേറ്റതിനെത്തുടര്ന്ന് ചെന്നൈ ഗ്ലോബല് ആശുപത്രിയില് ചികിത്സയിലായിരുന്ന സുകുമാരിയുടെ വൃക്കയുള്പ്പെടെയുള്ള ആന്തരികാവയവങ്ങളുടെ പ്രവര്ത്തനം തകരാറിലായിരുന്നു. ഇതേത്തുടര്ന്നുണ്ടായ ഹൃദയസ്തംഭനമാണു മരണകാരണം.
മലയാളം, തെലുങ്ക്, തമിഴ്, ഒറിയ, ഹിന്ദി, ബംഗാളി ഭാഷകളിലായി രണ്ടായിരത്തി അഞ്ഞൂറിലേറെ ചിത്രങ്ങളില് അഭിനയിച്ചിട്ടുണ്ട് സുകുമാരി.
1940 ഒക്ടോബര് ആറിനു തമിഴ്നാട്ടിലെ നാഗര്കോവിലില് മാധവന്നായര്-സത്യഭാമ ദമ്പതികളുടെ മകളായി സുകുമാരി ജനിച്ചു. പത്താംവയസില് 'ഒരു ഇരവ്' എന്ന ചിത്രത്തില് നൃത്തരംഗത്തിലൂടെയാണ് അഭിനയത്തിന്റെ തുടക്കം.
തിരുവിതാംകൂര് സഹോദരിമാര് എന്നറിയപ്പെട്ടിരുന്ന ലളിത, പദ്മിനി, രാഗിണി ത്രയങ്ങളുടെ മാതൃസഹോദരീപുത്രിയായിരുന്നു സുകുമാരി.
നാല്പതു വര്ഷത്തോളം നാടകരംഗത്തു പ്രവര്ത്തിച്ചു. വൈ.ജെ. പാര്ഥസാരഥി ട്രൂപ്പ്, ചോ രാമസാമിയുടെ വിവേക ഫൈന് ആര്ട്സ് എന്നീ നാടക ട്രൂപ്പുകളിലെ സജീവ അംഗമായിരുന്നു.
1974 (ചട്ടക്കാരി), 1979 (വിവിധ സിനിമകള്), 1983 (കൂടെവിടെ, കാര്യം നിസ്സാരം), 1985 (അരപ്പട്ടകെട്ടിയ ഗ്രാമം) എന്നീ വര്ഷങ്ങളിലെ ഏറ്റവും നല്ല സഹനടിക്കുള്ള സംസ്ഥാന സര്ക്കാരിന്റെ പുരസ്കാരം ലഭിച്ചു. 1967, 1974, 1980, 1981 എന്നീ വര്ഷങ്ങളില് കേരള ഫിലിം ഫാന്സ് അസോസിയേഷന് അവാര്ഡും 1991ല് തമിഴ്നാട് സര്ക്കാരിന്റെ കലൈമാമണി പുരസ്കാരവും സുകുമാരിക്കായിരുന്നു. 1971, 1974 വര്ഷങ്ങളിലെ മദ്രാസ് ഫിലിം ഫാന്സ് അസോസിയേഷന് അവാര്ഡ്, ജനകീയ ഫിലിം അവാര്ഡ്, ഏഷ്യാനെറ്റ് അവാര്ഡ് (1998), കേരളാ ഫിലിം ക്രിട്ടിക്സ് അവാര്ഡ് (2000), ഗള്ഫ് മലയാളി അവാര്ഡ് (2000), കലാകൈരളി അവാര്ഡ് (2001), ദുബായ് കൈരളി കേന്ദ്ര അസോസിയേഷന് അവാര്ഡ് (2001), സൂര്യ സ്റ്റേജ് ആന്ഡ് ഫിലിം സൊസൈറ്റി അവാര്ഡ് (2002), ഭരത് സിനി അവാര്ഡ് (2002) എന്നിവയാണ് സുകുമാരിക്ക് ലഭിച്ച മറ്റു പുരസ്കാരങ്ങള്. 2003ല് ആണ് കേന്ദ്ര സര്ക്കാര് പത്മശ്രീ നല്കി ആദരിച്ചത്.
പത്തൊമ്പതാമത്തെ വയസില് മഹാരാഷ്ട്രക്കാരനായ സിനിമാ സംവിധായകന് ഭീംസിംഗിനെ സുകുമാരി വിവാഹം കഴിച്ചു. ഡോ. സുരേഷാണ് ഏകമകന്.
