കൊല്ലം: കടലില്‍ രണ്ട് മത്സ്യത്തൊഴിലാളികളെ വെടിവെച്ച് കൊലപ്പെടുത്തിയ കേസില്‍ ഇറ്റാലിയന്‍ നാവികരുടെ ജാമ്യാപേക്ഷ തള്ളി. കൊല്ലം ജില്ലാ സെഷന്‍സ് കോടതിയാണ് ജാമ്യാപേക്ഷ തള്ളിയ ത്. ജാമ്യം നല്‍കിയാല്‍ വിചാരണ വേളയില്‍ പ്രതികളുടെ സാന്നിധ്യം ഉറപ്പാക്കാനാകില്ലെന്ന പ്രോസിക്യൂഷന്‍ വാദം അംഗീകരിച്ചാണ് കോടതി യുടെ നടപടി. രാജ്യത്തിന്റെയും ജനങ്ങളുടെയും താല്‍പര്യം അനുസരിച്ച് കേസില്‍ വിചാരണ എത്രയും വേഗം ആരംഭിക്കുന്നതാണ് നല്ലതെന്നും ജഡ്ജി രാജന്‍ ജാമ്യാപേക്ഷ പരിഗണിക്കവേ അഭിപ്രായപ്പെട്ടു.
 

ഒഞ്ചിയം: ടി.പി. ചന്ദ്രശേഖരന്‍ വധത്തിന്റെ അന്വേഷണത്തില്‍ ഒരു ഘട്ടത്തിലും ഇടപെട്ടിട്ടില്ലെന്ന് കേന്ദ്ര ആഭ്യന്തരമന്ത്രി മുല്ലപ്പള്ളി രാമചന്ദ്രന്‍ പറഞ്ഞു. അന്വേഷണത്തില്‍ താന്‍ ഇടപെട്ടുവെന്ന് ആര്‍ക്കെങ്കിലും തെളിയിക്കാനായാല്‍ എന്ത് പ്രായശ്ചിത്തവും ചെയ്യാന്‍ തയാറാണെന്നും മുല്ലപ്പള്ളി പറഞ്ഞു. ടി.പി. ചന്ദ്രശേഖരന്റെ വീട് സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു മുല്ലപ്പള്ളി. സിബിഐ അന്വേഷണം വേണമെന്ന പരാമര്‍ശത്തെക്കുറിച്ച് ചോദിച്ചപ്പോള്‍ അന്വേഷണത്തിന്റെ ഗതി മാറിയില്‍ സിബിഐ അന്വേഷണം വേണമെന്നാണ് താന്‍ പറഞ്ഞതെന്നായിരുന്നു അദ്ദേഹത്തിന്റെ മറുപടി.
 

തിരുവനന്തപുരം: പ്രതിപക്ഷനേതാവ് വി.എസ്.അച്യുതാനന്ദന്റെ മകന്‍ വി.എ.അരുണ്‍കുമാറിനെതിരെ വിജിലന്‍സ് അ ന്വേഷണം നടത്താന്‍ സംസ്ഥാന സര്‍ക്കാര്‍ തീരുമാനിച്ചു. കഴിഞ്ഞ സര്‍ക്കാരിന്റെ കാലത്ത് അരുണ്‍കുമാറിനെ ഐ.ടി.സി അ ക്കാദമി ഡയറക്ടറാക്കാന്‍ നടത്തിയ ശ്രമവും ഐ.എച്ച്.ആര്‍.ഡിയിലെ സ്ഥാനക്കയറ്റം സംബന്ധിച്ച ആരോപണങ്ങളുമാണ് വിജിലന്‍സ് അന്വേഷിക്കുക.
ആരോപണം സംബന്ധിച്ച നിയമസഭാസമിതിയുടെ ശുപാര്‍ശയുടെ അടിസ്ഥാനത്തിലാണ് വിജിലന്‍സ് അന്വേഷണത്തിന് സര്‍ക്കാര്‍ തീരുമാനിച്ചത്. കഴിഞ്ഞ മാര്‍ച്ച് എട്ടിനാണ് സമിതി റിപ്പോര്‍ട്ട് സമര്‍പ്പിച്ചത്. ഉന്നത വിദ്യാഭ്യാസ വകുപ്പ് സെക്രട്ടറിയാണ് അന്വേഷണത്തിന് ഉത്തരവിട്ടത്. വി.ഡി.സതീശന്‍ അധ്യക്ഷനായ നിയമസഭാ സമിതിയാണ് അന്വേഷണം നടത്തിയത്.

ഹൈദരാബാദ്: ആന്ധ്രയിലെ അനന്ത്പൂര്‍ ജില്ലയിലെ ഒദുലാപ്പള്ളിയിലുണ്ടായ റോഡപകടത്തില്‍ കര്‍ണാടക ഹൈക്കോടതി ജഡ്ജി മരിച്ചു. ജസ്റ്റീസ് ഗോവിന്ദരാജുലുവാണ് മരിച്ചത്. ഇദ്ദേഹത്തിന്റെ ഭാര്യയും രണ്ട് കുടുംബാംഗങ്ങളുമടക്കം നാലു പേര്‍ക്ക് പരിക്കേറ്റിട്ടുണ്ട്.രാവിലെ 11.30 ഓടെയായിരുന്നു അപകടം.
ഇവര്‍ സഞ്ചരിച്ച കാര്‍ നിയന്ത്രണം വിട്ടു മറിയുകയായിരുന്നു. അപകടം നടന്നയുടന്‍ തന്നെ ജഡ്ജിയെ കഡപ്പയിലെ രാജീവ് ഗാന്ധി ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. ബാംഗ്ളൂരില്‍ നിന്ന് കഡപ്പയിലെ പ്രോദത്തൂരിലേക്കുള്ള യാത്രയിലായിരുന്നു ജഡ്ജിയുടെ കുടുംബം. പരിക്കേറ്റവരില്‍ കാറിന്റെ ഡ്രൈവറും ഉള്‍പ്പെടും.
 

ന്യൂഡല്‍ഹി: രാഷ്ട്രപതി സ്ഥാനാര്‍ഥിയെക്കുറിച്ച് പാര്‍ട്ടി നിലപാട് പിന്നീട് പ്രഖ്യാപിക്കുമെന്ന് ബിഎസ്പി നേതാവ് മായാവതി. എന്‍ഡിഎയും യുപിഎയും സ്ഥാനാര്‍ഥിയെ പ്രഖ്യാപിക്കട്ടെന്നും അതിനുശേഷം ബിഎസ്പി നിലപാട് വ്യക്തമാക്കു മെന്നും അവര്‍ പറഞ്ഞു. ഡല്‍ഹിയില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു മായാവതി. യുപിയില്‍ നിയമമില്ലാത്ത അവസ്ഥയാ ണെന്നും പീഡനവും കൊലപാതകവും ഉള്‍പ്പെടെയുള്ള കുറ്റകൃത്യങ്ങള്‍ വര്‍ധിച്ചതായും മായാവതി ചൂണ്ടിക്കാട്ടി.
 

കൊളമ്പോ: ശ്രീലങ്കയുടെ വടക്കുകിഴക്കന്‍ പ്രദേശങ്ങളില്‍ നിന്നും സൈന്യത്തെ പിന്‍വലിക്കാനാവില്ലെന്ന് പ്രസിഡന്റ് മഹിന്ദ രാജപക്‌സെ വെളിപ്പെടുത്തി. വടക്കുകിഴക്കന്‍ പ്രദേശങ്ങള്‍ വിമതരുടെ കൈയില്‍ നിന്നും തിരികെ പിടിച്ചതിന്റെ വാര്‍ഷികത്തില്‍ സംസാരിക്കുകയായിരുന്നു അദ്ദേഹം.
എല്‍.ടി.ടി.ഇയുടെ നിയന്ത്രണത്തിലുണ്ടായിരുന്ന ഈ പ്രദേശങ്ങളില്‍ നിന്നും സൈന്യത്തെ പിന്‍വലിക്കാന്‍ നിരവധി രാജ്യങ്ങള്‍ ആവശ്യപ്പെട്ടിരുന്നു.
ലങ്കയില്‍ തമിഴ് വംശജര്‍ കൂടുതലുള്ള പ്രദേശങ്ങള്‍ സൈനിക വിമുക്തമാക്കണമെന്ന് യു.എസ് സ്റ്റേറ്റ് സെക്രട്ടറി ഹിലരി ക്ലിന്റണ്‍ ആവശ്യപ്പെട്ടതിന് മണിക്കൂറുകള്‍ക്കകമാണ് രാജപക്‌സയുടെ പ്രതികരണം. എല്‍.ടി.ടിയുടെ സമാന്തരഭരണം അവസാനിപ്പിച്ചതിനുശേഷം ലങ്ക നേടിയ പുരോഗതിയെക്കുറിച്ച് വിദേശരാജ്യങ്ങള്‍ ആലോചിക്കണമെന്നും അദ്ദേഹം ആവശ്യപ്പെട്ടു.
ലങ്കന്‍ വിദേശകാര്യമന്ത്രി ജി.എം പെയ്‌രിസുമായി വാഷിങ്ടണില്‍ നടത്തിയ കൂടിക്കാഴ്ചയില്‍ മനുഷ്യാവകാശങ്ങള്‍ സംരക്ഷിക്കണമെന്നും ഹിലരി ആവശ്യപ്പെട്ടിരുന്നു. ഐക്യരാഷ്ട്രസഭയും, ഇന്ത്യയും ഇതേകാര്യം നേരത്തെ ആവശ്യപ്പെട്ടിരുന്നതാണ്.
 

വാഷിംഗ്ടണ്‍:വാനനിരീക്ഷകര്‍ക്ക് വീണ്ടും ഒരു ദൃശ്യവിരുന്ന്. അപൂര്‍വ്വമായ പൂര്‍ണ്ണ സൂര്യഗ്രഹണമാണ് ഞായറാഴ്ച ദൃശ്യമാകാന്‍ പോകുന്നത്.
ജ്വലിച്ചുനില്‍ക്കുന്ന സൂര്യനെ ഏതാണ്ട് പൂര്‍ണ്ണമായി തന്നെ ചന്ദ്രന്‍ മറയ്ക്കും. അപ്പോള്‍ സൂര്യന്‍ ഒരു പ്രകാശവളയമായി കാണപ്പെടും. സൂര്യനെ 94 ശതമാനത്തോളം ചന്ദ്രന്‍ മറയ്ക്കും എന്നാണ് കരുതപ്പെടുന്നത്. വളയത്തിന്റെ ആകൃതിയിലുള്ള നിഴലുകളാണ് ഗ്രഹണസമയത്ത് ഭൂമിയില്‍ കാണപ്പെടുക.
അമേരിക്കയിലും ഏഷ്യയുടെ വിവിധഭാഗങ്ങളും ഗ്രഹണം ദൃശ്യമാകുമെന്ന് നാസ അറിയിച്ചു. ചൈനയിലും ജപ്പാനിലുമെല്ലാം തിങ്കളാഴ്ച പുലര്‍ച്ചെയാണ് ഗ്രഹണം ദൃശ്യമാകുക.സൂര്യന്റെയും ഭൂമിയുടെയും മധ്യേയായി ചന്ദ്രന്‍ ഒരേ നേര്‍രേഖയില്‍ വരുമ്പോള്‍ ആണ് സൂര്യഗ്രഹണം ഉണ്ടാകുന്നത്.